İranlı qadın futbolçular Asiya Kubokunda himni səsləndirmədi

Avstraliyada keçirilən 2026-cı il Asiya Kuboku çərçivəsində İran qadın futbolçuları start oyunundan əvvəl dövlət himnini səsləndirməyiblər.

90deqiqe.Az xəbər verir ki, bu addım Yaxın Şərqdə İsrail və ABŞ-ın İrana qarşı hücumlar başlatdığı və İranın BƏƏ-də və digər ölkələrdə yerləşən İsrail və ABŞ bazalarına hücumlarla cavab verdiyi münaqişənin kəskinləşməsi fonunda baş verib.

Turnirin ilk matçında İran millisi Cənubi Koreya üzərində 0:3 hesabı ilə uduzub. Qrupda həmçinin Avstraliya və Filippin komandaları yer alır. Bu, iranlı futbolçular üçün ölkəyə edilən hücumlardan sonra ilk rəsmi matç olub.

İran Futbol Federasiyasının prezidenti Mehdi Tacın açıqlamalarına görə, kişi yığmasının dünya çempionatında iştirak etməməsi ehtimalı mövcuddur. Komanda keçən il seçmə mərhələlər nəticəsində Dünya Çempionatına vəsiqə qazanıb. Turnir 11 iyun – 19 iyul 2026-cı il tarixlərində ABŞ, Kanada və Meksikada keçiriləcək.

Bundan əlavə, Yaxın Şərqdəki vəziyyət klub futboluna da təsir edib. AFC Çempionlar Liqasının 1/16 final, AFC Çempionlar Liqası 2 və Çağırış Kubokunun 1/4 final oyunları 2–4 mart tarixlərində planlaşdırılsa da, təxirə salınıb.