“Qarabağ”ın futbolçusu ilk dəfə milliyə çağırılıb

“Qarabağ”ın futbolçusu Kamilo Duran Kolumbiya milli komandasına çağırılıb.

Ağdam klubunun mətbuat xidmətindən 90deqiqe.Az-a verilən məlumata görə, 24 yaşlı hücumameyilli yarımmüdafiəçi mart ayında keçiriləcək yoldaşlıq görüşləri üçün yığmaya dəvət alıb.

İndiyədək Kolumbiya millisindən dəvət almayan vinger cari mövsümdə “Qarabağ”ın heyətində göstərdiyi uğurlu çıxışla məşqçilər heyətinin diqqətini cəlb etməyi bacarıb.

Duranın yer aldığı Kolumbiya millisi martın 26-da Xorvatiya, üç gün sonra isə Fransa yığması ilə qarşılaşacaq. Hər iki oyun ABŞ-nin Orlando şəhərində keçiriləcək.

Qeyd edək ki, Kamilo Duran 2025-ci ilin avqustunda “Qarabağ” klubuna transfer olunub.