FİFA İranla bağlı məsələyə aydınlıq gətirdi

Beynəlxalq Futbol Federasiyasında (FİFA) İranla əlaqələrin davam etdirildiyi təsdiqlənib və 2026-cı il dünya çempionatı çərçivəsində bu komandanın oyunlarının ABŞ-dən Meksikaya köçürülməsi ilə bağlı iddialara münasibət bildirilib.  

90deqiqe.Az xəbər verir ki, qurumun nümayəndəsi bildirib ki, FİFA turnirin planlaşdırılması ilə bağlı bütün üzv assosiasiyalar, o cümlədən İranla daim əlaqə saxlayır:

“FİFA 2026-cı il dünya çempionatının təşkili məsələlərini müzakirə etmək üçün bütün iştirakçı assosiasiyalarla daimi təmasdadır. Qurum 6 dekabr 2025-ci ildə elan olunmuş oyun cədvəlinə uyğun olaraq bütün komandaların çıxış edəcəyinə ümid edir”.

Daha əvvəl İran Futbol Federasiyasının rəhbəri Mehdi Tac bu cür müzakirələrin aparıldığını açıqlamışdı.

Qeyd edək ki, İran millisi Asiya zonası üzrə seçmə mərhələni uğurla keçərək G qrupunda yer alıb. Bu qrupda həmçinin Belçika, Misir və Yeni Zelandiya yığmaları mübarizə aparacaq.

İran yığması Yeni Zelandiya və Belçika ilə Los-Ancelesdə, Misirə qarşı isə Sietldə üz-üzə gəlməlidir.