Fransa ABŞ-da keçirilən yoldaşlıq oyununda Braziliyanı məğlub etdi

Yoldaşlıq görüşündə Braziliya milli futbol komandası və Fransa milli futbol komandası üz-üzə gəlib.

90deqiqe.Az xəbər verir ki, ABŞ-ın Foksboro şəhərində yerləşən "Cillet" stadionunda keçirilən matç 2:1 hesabı ilə Fransa millisinin qələbəsi ilə başa çatıb.

Oyunun 32-ci dəqiqəsində Kilian Mbappe hesabı açıb. 55-ci dəqiqədə Fransa millisinin müdafiəçisi Dayot Upamekano birbaşa qırmızı vərəqə alıb. 65-ci dəqiqədə Uqo Ekitike fərqi artıraraq komandasını önə çıxarıb. Braziliya millisinin müdafiəçisi Bremer 79-cu dəqiqədə fərqi azaldıb və matç 2:1 hesabı ilə başa çatıb.

Hər iki komanda 2026-cı il dünya çempionatında iştirak edəcək. Turnir gələcək yay ABŞ, Kanada və Meksikada keçiriləcək. Avropa seçmə mərhələsinin nəticəsinə görə Fransa D qrupunda 16 xal toplayaraq birinci yerə çıxıb, Braziliya isə Cənubi Amerika seçmə mərhələsində 28 xalla beşinci sırada qərarlaşıb.

Hazırda dünya çempionu Argentina milli futbol komandasıdır. Argentina millisi 2022-ci il dünya çempionatının finalında Fransa ilə qarşılaşıb. Oyunun əsas vaxtı 3:3 hesabı ilə başa çatsa da, penaltilər seriyasında Argentina 4:2 hesabı ilə qalib gələrək dünya çempionu olub.