Bosniya penaltilər seriyasında Uelsi məğlub edərək finala yüksəldi

2026-cı il dünya çempionatına vəsiqə uğrunda pley-off yarımfinalında Uels milli futbol komandası ilə Bosniya və Herseqovina milli futbol komandası üz-üzə gəlib.

90deqiqe.Az-ın məlumatına görə, oyunun favoriti aydın olmasa da, ev sahibi meydan üstünlüyü Uels millisinə müəyyən üstünlük verirdi.

İlk hissədə azarkeşlər çox qol imkanı görməyib – hər iki tərəf səhvə yol verməməyə çalışırdı. Oyunun ikinci hissəsinin əvvəlində isə Daniyel Ceyms Uelsi hesabda irəli çıxarıb. Bosniya komandası isə 86-cı dəqiqədə hesabı bərabərləşdirib. Təcrübəli hücumçu Edin Ceko, 40 yaşında olmasına baxmayaraq, künc zərbəsindən gələn topu başla dəqiq qapıya göndərərək oyunu 1:1 vəziyyətinə gətirib.

Əlavə vaxtda qapılara qol vurulmayıb və qalib penalti seriyası ilə müəyyənləşib. Seriyada 4:3 hesabı ilə Bosniya milli futbol komandası üstün olub. Beləliklə, Bosniya millisi finala yüksələrək 31 mart tarixində İtaliya milli futbol komandası ilə dünya çempionatına vəsiqə uğrunda qarşılaşacaq.