Qana millisinin baş məşqçisi istefaya göndərildi

Qana millisinin baş məşqçisi Otto Addo vəzifəsindən uzaqlaşdırılıb.

90deqiqe.Az-ın Qana Futbol Assosiasiyasına (GFA) istinadən məlumatına görə, 50 yaşlı mütəxəssislə yolların ayrılmasına yığmanın mart ayında uğursuz çıxışı səbəb olub.

Belə ki, Qana millisi yoldaşlıq görüşlərində Avstriyaya 1:5, Almaniyaya isə 1:2 hesabı ilə məğlub olub. Komanda ümumilikdə son dörd oyunda məğlubiyyətlə üzləşib.

Qeyd edək ki, 2024-cü ilin martından yığmaya rəhbərlik edən Otto Addo DÇ-2026-ya təxminən 10 həftə qalmış postunu itirib. Qana millisi ABŞ, Kanada və Meksikanın birgə ev sahibliyi edəcəyi dünya çempionatının qrup mərhələsində Xorvatiya, İngiltərə və Panama ilə qarşılaşacaq.