Dünya çempionatı iştirakçılarına ödənişlər artırıldı

Beynəlxalq Futbol Federasiyası yaxın dünya çempionatı iştirakçıları üçün ödənişləri əhəmiyyətli dərəcədə artırmaq qərarına gəlib.

90deqiqe.Az-ın “The Athletic”ə istinadən məlumatına görə, hər bir milli komanda 12,5 milyon dollar məbləğində vəsait alacaq ki, bu da əvvəlcədən planlaşdırılandan 2 milyon dollar çoxdur.

Mərhələlərin keçilməsi üçün nəzərdə tutulan mükafatlar dəyişməz qalıb. Əlavə ayrılan vəsaitlər isə nəticələrdən və oyunların keçirildiyi məkandan asılı olmayaraq bütün iştirakçılar arasında bərabər şəkildə bölüşdürüləcək. Bu qərar komandaların xərclərinin, xüsusilə də yüksək qiymətlər və vergilərlə seçilən ABŞ-də fərqli olmasına baxmayaraq qəbul edilib.

Qərarın federasiyaların turnirdə iştirakın baha başa gəlməsi və zərər riski ilə bağlı şikayətlərindən sonra verildiyi bildirilir. Bununla yanaşı, qurum bu addımın Avropa futbol qurumlarının təzyiqi ilə bağlı olduğunu təkzib edir.

Dünya futboluna rəhbərlik edən təşkilat turnirdən təxminən 11 milyard dollar həcmində rekord gəlir gözləyir. Bu vəsaitin bir hissəsinin daha sonra dünyada futbolun inkişafına yönəldiləcəyi qeyd olunur.