Niderland son dəqiqələrdə qələbəni əldən verdi

ABŞ, Kanada və Meksikanın birgə ev sahibliyi etdiyi futbol üzrə dünya çempionatında F qrupunun ilk turunda Niderland və Yaponiya milliləri üz-üzə gəliblər.

90deqiqe.Az-ın məlumatına görə, ABŞ-nin Texas ştatının Arlinqton şəhərində yerləşən "AT&T" stadionunda keçirilən qarşılaşma 2:2 hesablı heç-heçə ilə yekunlaşıb.

Oyunda hesabı ikinci hissənin əvvəlində Niderland millisinin kapitanı Vircil van Deyk açıb. Yaponiya yığmasının cavabı gecikməyib və Keyto Nakamura 57-ci dəqiqədə tarazlığı bərpa edib.

64-cü dəqiqədə Krisensio Sammervill Avropa təmsilçisini yenidən önə çıxarsa da, Yaponiya son dəqiqələrdə məğlubiyyətdən xilas olmağı bacarıb. Daçi Kamada 89-cu dəqiqədə vurduğu qolla komandasına vacib bir xal qazandırıb.

Beləliklə, F qrupunda ilk turun ardından Niderland və Yaponiya milliləri hərəyə bir xal toplayaraq turnir cədvəlinin zirvəsində qərarlaşıblar.

Qeyd edək ki, qrupun digər ilk tur oyununda İsveç və Tunis milliləri qarşılaşacaqlar.