Lamin Yamal dünya çempionatlarında ilk qolunu vurdu

İspaniya millisinin futbolçusu Lamin Yamal dünya çempionatlarındakı ilk qoluna imza atıb.

90deqiqe.Az xəbər verir ki, bu hadisə 2026-cı il dünya çempionatının H qrupunun II turunda İspaniya və Səudiyyə Ərəbistanı yığmaları arasında keçirilən qarşılaşmada baş verib.

ABŞ-nin Atlanta şəhərindəki "Mersedes-Bens" stadionunda oynanılan görüşdə hesabı 10-cu dəqiqədə məhz Yamal açıb.

Beləliklə, gənc hücumçu dünya çempionatları tarixində ilk qolunu vuraraq İspaniya millisinin önə keçməsində mühüm rol oynayıb.

Qeyd edək ki, 2026-cı il dünya çempionatı iyunun 11-dən iyulun 19-dək ABŞ, Kanada və Meksikada keçirilir.

Hazırkı dünya çempionu Argentinadır. Cənubi Amerika təmsilçisi 2022-ci ildə Qətərdə keçirilən mundialın finalında Fransa yığmasını penaltilər seriyasında məğlub edərək çempionluğa yiyələnmişdi. Matçın əsas və əlavə vaxtı 3:3 hesabı ilə başa çatmış, penaltilərdə isə argentinalılar 4:2 hesabı ilə üstün olmuşdular.