- Dünya çempionatı
- 23:38 22.06.2026
2026-cı il futbol üzrə dünya çempionatının J qrupunda ikinci turun Argentina – Avstriya oyunu başa çatıb.
90deqiqe.Az xəbər verir ki, ABŞ-nin Texas ştatının Arlinqton şəhərində yerləşən stadionda keçirilən qarşılaşmanı Misirdən olan hakim Əmin Ömər idarə edib. Görüş Argentina millisinin 2:0 hesablı qələbəsi ilə yekunlaşıb.
Matçın 9-cu dəqiqəsində Argentina yığmasının hücumçusu Lionel Messi Lautaro Martinesə qarşı qayda pozuntusuna görə təyin olunan onbir metrlik cərimə zərbəsindən yararlana bilməyib. Buna baxmayaraq, Messi 39-cu dəqiqədə hesabı açaraq komandasını önə keçirib.
Görüşün əsas vaxta əlavə olunmuş beşinci dəqiqəsində isə argentinalı ulduz ikinci qolunu vuraraq yekun hesabı müəyyənləşdirib – 2:0.
İki turdan sonra Argentina millisi altı xalla J qrupunun lideridir. Avstriya yığması isə üç xalla ikinci pillədə qərarlaşıb.
Üçüncü turda Argentina millisi iyunun 28-də İordaniya ilə üz-üzə gələcək. Həmin gün Avstriya yığması Əlcəzairlə qarşılaşacaq.
Qeyd edək ki, 2026-cı il dünya çempionatı iyunun 11-dən iyulun 19-dək ABŞ, Kanada və Meksikada keçirilir. Turnirin son qalibi Argentina millisidir. Argentinalılar 2022-ci il dünya çempionatının finalında Fransa yığması ilə qarşılaşaraq əsas və əlavə vaxtı 3:3 hesabı ilə başa çatan oyunda penaltilər seriyasında 4:2 hesablı üstünlüklə qələbə qazanıblar.
