Bruno Quimareş Pelenin rekorduna bir addım da yaxınlaşdı

Braziliya millisinin yarımmüdafiəçisi Bruno Quimareş 2026-cı il dünya çempionatında diqqətçəkən göstəriciyə imza atıb.

90deqiqe.Az xəbər verir ki, Braziliyanın Yaponiya üzərində 2:1 hesablı qələbə qazandığı 1/16 final oyununda Qabriel Martinellinin vurduğu həlledici qolun məhsuldar ötürməsini məhz Quimareş edib.

Bununla da 27 yaşlı futbolçu mundialda məhsuldar ötürmələrinin sayını dördə çatdıraraq turnirin ən yaxşı assistenti olub.

Dünya çempionatlarının tarixində bir turnirdə Brunodan daha çox məhsuldar ötürmə edən son braziliyalı əfsanəvi Pele olub. Futbol kralı 1970-ci il dünya çempionatında komanda yoldaşlarına altı qol ötürməsi vermişdi.

Qeyd edək ki, Braziliya millisi 1/8 finalda Kot-d'İvuar – Norveç cütünün qalibi ilə qarşılaşacaq.