Dünya çempionatındakı uğursuzluqdan sonra Erve Renar istefa verdi

2026-cı il dünya çempionatında Tunis millisinin baş məşqçisi postuna Sabri Lamuşinin əvəzinə təyin olunan Erve Renar vəzifəsindən ayrıldığını açıqlayıb.

90deqiqe.Az xəbər verir ki, fransalı mütəxəssis qərarını sosial şəbəkə hesabında paylaşıb. Erve Renar açıqlamasında bunları deyib:

“2026-cı il dünya çempionatında iştirak etmək imkanı yaratdığına görə Tunis Futbol Federasiyasına səmimi təşəkkürümü bildirirəm. Tunis millisinin şərəfini qorumaq və bu unudulmaz təcrübəni yaşamaq mənim üçün böyük qürur idi. Komandaya gələcəkdə uğurlar arzulayıram. İnanıram ki, Tunis millisi inkişaf etməyə, azarkeşlərini sevindirməyə və tarixini yeni uğurlarla zənginləşdirməyə davam edəcək. Bu yol boyu mənə dəstək olan hər kəsə təşəkkür edirəm. Mənim macəram burada başa çatdı”.

Qeyd edək ki, Tunis millisi dünya çempionatının F qrupunda keçirdiyi hər üç görüşdə məğlub olub.

Komanda ilk turda İsveçə 1:5 hesabı ilə uduzduqdan sonra Sabri Lamuşi baş məşqçi postundan uzaqlaşdırılmışdı.

Onun yerinə təyin olunan Erve Renarın rəhbərliyi altında Tunis millisi Yaponiyaya 0:4, Niderlanda isə 1:3 hesabı ilə məğlub olaraq mundialla qrup mərhələsində vidalaşıb.