"Mənə marketinq vasitəsi kimi yox, futbolçu kimi baxan komanda istəyirəm"

Kabo-Verde millisinin qapıçısı Vozinya 2026-cı il dünya çempionatından sonra gələcəyi ilə bağlı danışıb və ölkəsində futbolçuların üzləşdiyi çətinliklərdən söz açıb.

90deqiqe.Az-ın “CBS Mornings”a istinadən məlumatına görə, təcrübəli qolkiper bildirib ki, uşaqlıqdan peşəkar futbolçu olmaq arzusunda olub, lakin Kabo-Verde kimi ölkələrdən olan oyunçular üçün bu yola çıxmaq asan deyil.

"Uşaqlıqdan arzum peşəkar futbolçu olmaq idi. Lakin bizim ölkədə bunu reallaşdırmaq imkanları çox azdır. Afrikalı futbolçular olaraq viza məsələləri ilə bağlı problemlərlə üzləşirik. Halbuki çoxlu istedadlı insanlarımız var. Kabo-Verdedə isə səni heç kim görmür.

Ölkəmizdə lazımi infrastruktur və uyğun şərait yoxdur. Bəli, burada çoxlu istedad var, amma əvvəlki illərdə olduğu kimi, Avropaya getmək imkanı olmadan bu istedadları göstərmək çətindir. Böyük klubların olduğu və inkişaf edə biləcəyin yerlərə getmək lazımdır.

Gələcəyimə gəlincə, ən azı bir-iki il daha oynamaq istəyirəm. Bədənimin özünü necə hiss edəcəyinə baxacağıq, çünki sabah nə olacağını heç kim bilmir. Amma oynamaq istəyirəm. Ümid edirəm ki, məndə marketinq vasitəsi yox, futbolçu görən bir komanda tapacağam", – deyə Vozinya bildirib.

Qeyd edək ki, Vozinya Kabo-Verde millisinin əsas qapıçılarından biridir və uzun illərdir ölkəsinin futbol tarixində mühüm rol oynayır.