"Təzyiq məni sarsıda bilməz"

Argentina milli komandasının kapitanı Emiliano Martines dünya çempionatının final oyunu öncəsi mətbuat konfransında komandanın psixoloji hazırlığı, şəxsi motivasiyası və gənc futbolçular üçün örnək olması barədə danışıb.

90deqiqe.Az-ın məlumatına görə, təcrübəli qapıçı bildirib ki, komandaya inam və sakitlik aşılamaq onun əsas vəzifələrindən biridir.

"Özümü həqiqətən çox sakit hiss edirəm. Komanda yoldaşlarım arxalarında arxayın qapıçının dayandığını görəndə yalnız hücuma köklənirlər. Mənim işim onlara ehtiyac duyduqları anda kömək etməkdir. Bu dünya çempionatında hər oyunda orta hesabla üç qol vurmuşuq və hücumda çox uğurlu çıxış etmişik. Eyni zamanda, əvvəlki dünya çempionatı ilə müqayisədə daha az qol buraxmışıq. Finalda da qapımızı toxunulmaz saxlamağı səbirsizliklə gözləyirəm", – deyə Martines bildirib.

33 yaşlı qapıçı milli komandadakı ilk oyununa 28 yaşında çıxmasına və bu gün bir çox uşağın onu örnək hesab etməsinə də münasibət bildirib.

"Bir qapıçılar məktəbinin rəhbəri mənə dedi ki, məktəb fəaliyyətə başlayandan bəri heç vaxt bu qədər qapıçı olmayıb. Bu, sevindirici haldır. Düzdür, mən həmişə valideynlərə uşaqlarının hücumçu olmasını arzulamağı tövsiyə edirəm. Amma ümid edirəm ki, gələcəkdə daha çox istedadlı qapıçı yetişəcək. Qapıçı olmaq hər zaman çətin olub və bu uğur asan qazanılmır", – deyə o vurğulayıb.

Martines təzyiq altında oynamaq bacarığından da söz açıb.

"Təzyiq məni sarsıda bilməz. Mən yalnız əlcəklərimi geyinib oyuna köklənirəm. Top qapıya yaxınlaşanda öz-özümə deyirəm ki, onu dəf etmək şansım daha yüksəkdir. İstər yoldaşlıq oyunu, istərsə də dünya çempionatının finalı olsun, qapıda özümə tam güvənirəm. İçimdə hələ də məhəllə futbolunun ruhu yaşayır. Qarşımda kim oynayırsa-oynasın, mən yenə həmin məhəllədə futbol oynayan Martinesəm", – deyə Argentina millisinin kapitanı əlavə edib.