"Bizi məğlub edən hakim yox, İspaniya idi"

Fransa millisinin baş məşqçisi Didye Deşam dünya çempionatında İngiltərə ilə keçiriləcək üçüncü yer uğrunda oyun öncəsi mətbuat konfransında yarımfinal məğlubiyyəti, hakimlik və komandasının hədəfləri barədə danışıb.

90deqiqe.Az-ın məlumatına görə, 57 yaşlı mütəxəssis bildirib ki, Fransa millisinin baş məşqçisi kimi son oyununa çıxacağı üçün böyük məsuliyyət hiss edir.

Deşam etiraf edib ki, üçüncü yer uğrunda oyunda iştirak etmək istəməzdi. Lakin hazırkı vəziyyətdə komandanın yeganə məqsədi qələbə qazanmaqdır.

"Əlbəttə, bu oyunu keçirməməyə üstünlük verərdim. Ancaq indi qarşımızda rəsmi qarşılaşma var və mənim, məşqçilər heyətinin, eləcə də futbolçuların borcu son məqsədimizə çatmaq üçün əllərindən gələni etməkdir. Ola bilər ki, bu hədəf əvvəlki qədər böyük deyil, amma artıq buradayıq. Heç kim oyundan yayınmaq istəmir və səhv etmək hüququmuz yoxdur", – deyə Deşam bildirib.

Təcrübəli mütəxəssis yarımfinalda İspaniyaya məğlubiyyətin səbəbinin hakim idarəçiliyi olmadığını xüsusi vurğulayıb.

"İspaniya ilə oyunda rəqib bizdən üstün idi. Fiziki göstəricilərdə, qaçış məsafəsində və intensivlikdə daha yaxşı nəticələr göstərmiş ola bilərik. Ancaq bu, yekun nəticəni dəyişmir. İspaniya oyun səviyyəsini yüksəltdi, futbolunu inkişaf etdirdi və bizimlə eyni səviyyədə olduğunu sübut etdi. Bunu qəbul etməliyik. Mənə hakim barədə suallar verirlər. Bizi məğlub edən hakim deyildi. İspaniya haqqında belə söz deyə bilmərəm. Finala yüksələn hər iki komanda buna layiq idi", – deyə o qeyd edib.

Deşam 2012-ci ildən Fransa millisini çalışdırdığını xatırladaraq bu vəzifənin hər zaman böyük məsuliyyət daşıdığını bildirib.

"Bu vəzifəyə gələndə üzərimizə düşən məsuliyyəti yaxşı anlayırdıq. Məqsədimiz milyonlarla fransız üçün bu formanı ən yüksək səviyyədə təmsil etmək idi. Hətta yoldaşlıq oyunu olsa belə, hər qarşılaşmaya eyni məsuliyyətlə yanaşmışıq. 1998-ci ildə futbolçu, 2018-ci ildə isə baş məşqçi kimi unudulmaz anlar yaşamışam. Yeni nəsil də bunun fərqindədir. Mənim üçün heç bir uğur digərindən üstün deyil", – deyə Fransa millisinin baş məşqçisi əlavə edib.