Blatter FİFA rəhbərliyini sərt tənqid etdi

Beynəlxalq Futbol Federasiyasının (FİFA) sabiq prezidenti Yozef Blatter 2026-cı il dünya çempionatından sonra qurumun rəhbərliyini tənqid edib.

90deqiqe.Az-ın məlumatına görə, keçmiş funksioner dünya futbolunda idarəetmə yanaşmasının dəyişdirilməsinin vacibliyini vurğulayıb.

"Tarixin ən uzun dünya çempionatı layiqli qalibin qələbəsi ilə başa çatdı. Lakin final fitinə qədər turnir etibarını itirdi. Siyasət heç vaxt futbolun önünə keçməməlidir"

O, futbolun yenidən azarkeşlərin, futbolçuların və milli assosiasiyaların maraqlarına uyğun idarə olunmasının vacibliyini də qeyd edib.

"Azarkeşlər, futbolçular və milli assosiasiyalar futbolu geri qaytarmalı, onu yeni rəhbərlik altında öz köklərinə qaytarmalıdırlar", - deyə sabiq FİFA prezidenti əlavə edib.

Qeyd edək ki, daha əvvəl İspaniya La Liqasının prezidenti Xavyer Tebas da FİFA prezidenti Canni İnfantinonu tənqid etmişdi. O bildirmişdi ki, FİFA dünya çempionatına həddindən artıq diqqət ayıraraq milli çempionatların və ümumilikdə futbol sənayesinin maraqlarını ikinci plana keçirir.

Xatırladaq ki, Canni İnfantino 2016-cı ildən FİFA prezidenti vəzifəsini icra edir. Onun növbəti müddətə yenidən seçilməsi məsələsinə 2027-ci ilin mart ayında baxılması gözlənilir.