"Finaldan sonra deyiləcək söz qalmamışdı"

Argentina millisinin baş məşqçisi Lionel Skaloni 2026-cı il dünya çempionatının finalında İspaniyaya 0:1 hesabı ilə uduzduqları oyundan sonra futbolçularla söhbət edib-etmədiyi barədə danışıb.

90deqiqe.Az-ın məlumatına görə, təcrübəli mütəxəssis bildirib ki, final fitindən sonra komanda qarşısında çıxış edən şəxs kapitan Lionel Messi olub.

"Xeyr, futbolçularla danışan kapitan idi. Mən yalnız bəzi oyunçularla qısa söhbət etdim. Düzünü desəm, deyiləcək elə də çox söz yox idi. Hamını dərin kədər bürümüşdü", - deyə Skaloni bildirib.

Qeyd edək ki, Argentina millisi final qarşılaşmasında yeganə qolu əlavə vaxtın 106-cı dəqiqəsində buraxıb. Komanda əsas vaxtın sonuna əlavə olunan üçüncü dəqiqədə Enso Fernandesin qırmızı vərəqə alması səbəbindən oyunu azlıqda başa vurub.