Canni İnfantino FİFA prezidentliyinə yenidən namizəd olacaq

FİFA prezidenti Canni İnfantino 2027-ci ildə keçiriləcək növbəti seçkilərdən sonra da qurumun rəhbəri vəzifəsini qorumaq niyyətindədir.

90deqiqe.Az xəbər verir ki, FİFA-nın nümayəndəsi jurnalist Rob Harrisə açıqlamasında İnfantinonun 2027-ci ildə keçiriləcək seçkilərdə yenidən namizədliyini irəli sürəcəyini təsdiqləyib.

“FİFA prezidenti aprel ayında 2027-ci ildə yenidən seçilmək üçün namizədliyini irəli sürəcəyini açıqlamışdı. Təbii ki, bu məsələdə heç nə dəyişməyib. Cənab İnfantino seçkilərdə iştirak edəcək”, - deyə FİFA nümayəndəsi bildirib.

Qeyd edək ki, Canni İnfantino 2016-cı ilin fevralından FİFA-ya rəhbərlik edir.

Son vaxtlar onun qurumdakı mövqeyi təzyiq altında qalıb. Buna səbəb FİFA-nın kommersiya hüquqlarının bir hissəsinin, o cümlədən dünya çempionatı ilə bağlı hüquqların satılmasını nəzərdə tutan layihənin baş tutmaması ətrafında yaranan qalmaqal olub.