Tuxel İngiltərə millisinin DÇ-2026 çıxışından danışdı

İngiltərə millisinin baş məşqçisi Tomas Tuxel 2026-cı il dünya çempionatında Argentina ilə yarımfinal oyunundan sonra etdiyi taktiki dəyişikliklərin azarkeşlər tərəfindən geniş müzakirə olunmadığını bildirib.

90deqiqe.Az xəbər verir ki, Tuxel Fernandesin qolundan əvvəl üç müdafiəçiyə keçmək qərarına görə tənqid olunub. Almaniyalı mütəxəssis isə azarkeşlərin komandanın DÇ-2026-dakı çıxışını daha çox emosional xatirələrlə əlaqələndirdiyini deyib.

“Azarkeşlərin 99,9 faizi əvəzetmələr, taktiki dəyişikliklər və taktiki detallardan danışmır. Onlar Meksika ilə oyunu harada izlədiklərini və Xorvatiya ilə matçın ikinci hissəsindəki enerjini xatırlayırlar”, - deyə Tuxel “Sky Sports”a bildirib.

“Onlar Konqo ilə oyuna baxarkən nə qədər həyəcan keçirdiklərini və qələbəni harada qeyd etdiklərini danışırlar. Mənə gələn rəylər əsasən belədir. Biz məhz belə bir atmosfer yaratmışıq və bundan sonra da bunu davam etdirmək istəyirik. Dünya çempionatının mənası da budur - insanları bir araya gətirmək və onlara unuda bilməyəcəkləri xatirələr bəxş etmək”.

Xatırladaq ki, İngiltərə yarımfinalda Argentina ilə qarşılaşmada ikinci hissədə Entoni Qordonun qolu ilə hesabı açıb. Lakin Enso Fernandes hesabı bərabərləşdirib, Lautaro Martines isə Argentina yığmasına 2:1 hesablı qələbə qazandırıb.

Qeyd edək ki, eyni materialda keçirilən sorğuda azarkeşlərdən DÇ-2026-da İngiltərə millisinin çıxışından ən çox nəyi xatırladıqları soruşulub. Respondentlərin 82 faizi “Argentina ilə oyundakı əvəzetmələr” variantını seçib.