UEFA FİFA-dan noyabrın 2-dək mühüm sənədləri təqdim etməyi tələb etdi

UEFA FİFA-dan təşkilatın idarəetmə sistemi və bir sıra qərarların qəbulu ilə bağlı əsas sənədləri noyabrın 2-dək təqdim etməyi, həmçinin müvafiq sualları cavablandırmağı tələb edib.

90deqiqe.Az-ın məlumatına görə, bu barədə "BBC Sport" məlumat yayıb.

Dərc olunan səkkiz səhifəlik sənəddə FİFA Forward Enterprise (FFE) layihəsinə özəl investisiyaların cəlb edilməsi, FİFA Sülh Mükafatı və son dünya çempionatında ABŞ millisinin hücumçusu Folarin Baloquna tətbiq edilən mübahisəli şərti diskvalifikasiya məsələləri yer alıb.

Cümə axşamı FİFA Şurasının iclasında qurumun prezidenti Canni İnfantino dünya çempionatının kommersiya məqsədilə təşkili planına görə üzr istəyib. Bununla belə, o, təşəbbüsün necə hazırlandığını tam şəkildə izah etməyib.

UEFA-dan bildirilib ki, cavablar dərhal təqdim olunmalıdır və məsələni FİFA Şurasının növbəti iclasınadək təxirə salmaq olmaz. Qurum həmçinin vurğulayıb ki, gələcək islahatlar artıq qəbul edilmiş qərarların yoxlanılmasını və həmin qərarlara görə məsuliyyət məsələsini əvəz edə bilməz.

Avropa futbol qurumu FİFA-nın müəyyən edilmiş müddətdə tələbləri yerinə yetirməyəcəyi təqdirdə hansı addımları atacağını açıqlamayıb.