"Mercedes" mühərrik qaydalarının dəyişdirilməsi ilə razılaşmayacaq

"Mercedes" komandasının lideri Toto Volf, Almaniya komandasının yeni mühərrik inkişafı ilə bağlı texniki reqlamentlərin dəyişdirilməsinə razı olmayacağını bildirib.

90deqiqe.Az "Motorsport"a istinadən xəbər verir ki, Volf, "Mühərriklərə gəlincə, gəmi artıq yola düşüb," deyə vurğulayıb.

FIA formula yarışlarının direktoru Nikolas Tombasis, federasiyanın yeni reqlament layihəsinə düzəlişlər etməyə hazır olduğunu bildirsə də, mühərrik qaydalarını dəyişdirmək üçün bütün Formula 1 komandalarının razılığı tələb olunur. Volf bu barədə, "Elə komandalar var ki, özlərini geridə hiss edirlər. Digər komandalar və istehsalçılar da var ki, özləri yaxşı iş görüblər, ona görə də bu, qaydalar uğrunda normal mübarizədir," deyə qeyd edib.

Volf, şassi qaydalarına bəzi dəyişikliklərin edilə biləcəyini qəbul etsə də, mühərriklərə dair prosesin artıq çox inkişaf etdiyini və bu səbəbdən dəyişikliklərin mümkün olmadığını bildirib.