"Aston Martin" rəhbəri Fernando Alonsonun əvəzlənməsinin səbəbini açıqlayıb

"Aston Martin" komandasının rəhbəri Mayk Krak Felipe Druqoviçin yarış həftəsonunun ilk məşq sessiyasında Fernando Alonsonu niyə əvəzləyəcəyini açıqlayıb.

90deqiqe.Az xəbər verir ki, "Skycope Sports" onun dediklərini belə çatdırıb.

"Bu, əzələ problemidir. Spa-dan sonra müzakirə olundu. Bizim təqvimimizlə sağalmağa çox vaxtımız yoxdur. Bəzən yatmağa belə vaxt olmur, çünki harasa getməlisən. Felipe Druqoviçlə şanslıyıq, o, çox etibarlı sürücüdür və o, Fernando üçün hazırladığımız proqramla işləyəcək. Bu, kiçik bir problemdir, amma hər şeyin öhdəsindən gəlirik."

Felipe Druqoviç "Aston Martin"in ehtiyat sürücüsüdür. O, əvvəllər praktikada komandanın yarış sürücülərini əvəz edib. Komanda başqa dəyişiklikləri açıqlamasa, Alonso ikinci sessiyadan etibarən həftəsonunda iştirakını davam etdirəcək.