Mik Şumaxer "IndyCar" komandasında ilk testlərinə çıxacaq

Keçmiş Formula-1 pilotu Mik Şumaxer ABŞ-ın Rahal Letterman "Lanigan Racing" komandasında testlər keçirəcək. 

90deqiqe.Az-ın məlumatına görə, bu barədə komandanın rəsmi mətbuat xidməti məlumat yayıb.

Testlər oktyabrın 13-də məşhur “Indianapolis Motor Speedway” trasında təşkil olunacaq. Mətbuat açıqlamasında qeyd olunur ki, testlər almaniyalı pilota bolidi daha yaxşı tanımağa və mümkün IndyCar seriyasına qoşulmaq üçün hazırlıq keçməyə imkan verəcək.

Mik Şumaxer testlərlə bağlı fikirlərini belə bölüşüb:

“IndyCar"dakı ilk testlərimi səbirsizliklə gözləyirəm. Rahal Letterman Lanigan komandasına mənə bu fürsəti verdikləri üçün böyük təşəkkürümü bildirirəm. Eyni zamanda bu, Indianapolis trasında ilk çıxışım olacaq – trasın zəngin tarixi var və atam da burada yarışıb. Bolidin xüsusiyyətlərini öyrənmək çox maraqlıdır.

Bu avtomobilin xüsusiyyətlərini və performansını öyrənmək maraqlıdır; fərqlidir, amma eyni zamanda tanışdır. Mən hələ də müxtəlif avtomobil yarışları təcrübəsi qazanmaq istəyirəm. Bu fürsəti görmək və nə qədər çətin olduğunu anlamaq çox yaxşıdır, çünki onun fiziki tələbləri yüksəkdir. Heç kimə sirr deyil ki, mən tək oturacaqlı avtomobillərin yarışlarının böyük pərəstişkarıyam, buna görə də bu ilk “IndyCar" testləri mənim üçün unudulmaz olacaq.”