Türkiyə Qran Prisi beş il müddətinə Formula 1 təqviminə qayıda bilər

Türkiyənin “İstanbul-Park” trası Formula-1 Qran-Prisinin təqvimə daimi olaraq daxil edilməsi üçün danışıqlar aparır.

90deqiqe.Az-ın "Auto Sport Web"ə istinadən məlumatına görə, beşillik müqavilə təklifi 2025-ci ilin yayında irəli sürülüb. Müqavilənin əsas şərti trasın infrastrukturunun müasir Formula 1 İdarəetmə (FOM) standartlarına cavab verməsi üçün modernləşdirilməsidir. Təşkilatçılar işi maliyyələşdirmək üçün investorlar axtarırlar.

Çətin relyefi və səkkizinci döngəsi ilə tanınan tras 2020 və 2021-ci illərdə müvəqqəti olaraq Formula-1 təqviminə daxil edilmişdi. Danışıqlar uğurla nəticələnərsə, “İstanbul-Park” daimi mərhələ olacaq, Portimano (Portuqaliya) trası kimi rotasiya prinsipi tətbiq edilməyəcək.