“Qəzaya hazırlaşmışdım, amma..."

“Penske” komandasının pilotu Skott Makqloklin “Barber Motorsports Park” trasında keçirilən “IndyCar” məşqləri zamanı sürətli birinci döngəyə girişdə qəza törədib.

90deqiqe.Az xəbər verir ki, hadisədən sonra sessiya qırmızı bayraqlarla dayandırılıb.

Yeni zelandiyalı sürücü avtomobil üzərində nəzarəti itirərək arxa hissə ilə qoruyucu təkər baryerlərinə və hasara çırpılıb. Qəzanın ciddi görünməsinə baxmayaraq, Makqloklin xəsarət almayıb və boliddən müstəqil şəkildə çıxa bilib.

Sürücü hadisəni belə şərh edib:
“Açığı, qəza kənardan göründüyü qədər ağır deyildi. Ümid edirəm ki, maşını bərpa edib yenidən trasa çıxacağıq və sıralama turunda yaxşı nəticə göstərəcəyik. Toqquşmanın qaçılmaz olduğunu başa düşürdüm və hazırlaşmağa çalışdım. Nəticədə isə baryerə doğru yarıyolda idim, bu isə kifayət qədər həyəcanlı an idi. Komandam adına çox üzgünəm. Mənim ən güclü texniki heyətim var və onlar maşını mümkün qədər tez bərpa edəcəklər.”

Makqloklinin çıxış etdiyi 3 nömrəli avtomobilə xidmət edən komanda üzvləri və digər mexaniklər bolid paddoka qaytarılan kimi dərhal işə başlayıblar. Onlar yarış həftəsonunun sonuna qədər istifadə oluna biləcək ehtiyat avtomobilin hazırlanması ilə məşğuldurlar.