Qasliyə Böyük Britaniya Qran-prisi öncəsi cəza verildi

“Alpin” komandasının pilotu Pyer Qasli Böyük Britaniya Qran-prisinin sıralama turunda “Aston Martin”in sürücüsü Lens Strolla mane olduğu üçün cəzalandırılıb.

90deqiqe.Az  xəbər verir ki, Beynəlxalq Avtomobil Federasiyasının (FIA) stüardları fransalı pilotun bazar günü keçiriləcək əsas yarışın start düzümündə üç mövqe geriyə salınmasına qərar veriblər.

Stüardların açıqlamasında bildirilir ki, sıralama turunun ilk sessiyasında Stroll sürətli dövrəsini vurarkən Qasli boksa qayıdış dövrəsində olub. O, 15-ci döngəyə yaxın yarış trayektoriyasında aşağı sürətlə hərəkət edərək kanadalı pilotu trayektoriyanı dəyişməyə məcbur edib.

Qasli izahatında həmin anda radiosunun işləmədiyini, rabitəni yoxlamağa çalışdığını və arxasında olan Andrea Kimi Antonellinin sürətli dövrədə olmadığını düşündüyü üçün onu ötməyəcəyini hesab etdiyini bildirib. Komanda nümayəndəsi isə radio xəbərdarlığının Formula 1-in texniki sistemində yaranmış nasazlıq səbəbindən verilmədiyini qeyd edib.

Stüardlar texniki problemin baş verdiyini təsdiqləsələr də, bunun pilotun məsuliyyətini aradan qaldırmadığını vurğulayıblar. Araşdırma zamanı müəyyən edilib ki, Qaslinin sükan panelində Strollun sürətli dövrədə olduğu barədə məlumat mövcud olub və o, buna baxmayaraq yarış trayektoriyasını vaxtında tərk etməyib.

Nəticədə FIA Pyer Qaslinin rəqibinə əsassız maneə yaratdığı qənaətinə gələrək ona üç start mövqeyi itirmək cəzası verib.