"Qələbə uğrunda mübarizə aparacaq sürətimiz var idi, lakin hər şey əleyhimizə işləyirdi"

Formula 1 üzrə dünya çempionatının lideri, "Mersedes" komandasının pilotu Andrea Kimi Antonelli Böyük Britaniya Qran-prisinin yekunlarını dəyərləndirib.

90deqiqe.Az xəbər verir ki, italiyalı pilot yarışın lideri, "Ferrari" təmsilçisi Şarl Lekleri uğurla təqib etsə də, bolidində gözlənilmədən texniki nasazlıq yaranıb. Nəticədə Antonelli yarışı ümumi sıralamada 16-cı pillədə başa vurub.

"Bu gün hər şeyin əleyhimizə işlədiyi yarışlardan biri oldu. Tempimiz çox yüksək idi və fərqi azaltmaq, hətta qələbə uğrunda mübarizə aparmaq üçün kifayət qədər sürətli olduğumuzu hiss edirdim. Elə buna görə də yarışın belə başa çatması xüsusilə məyusedicidir. Qələbə uğrunda real mübarizə aparmaq imkanımız olmadı, amma bəzən belə hallar sənin nəzarətindən kənarda olur.

Zədələnmə tamamilə gözlənilmədən baş verdi. Həmin döngədəki bordürdən hər dövrədə istifadə edirdim, lakin məhz o anda üzərinə çıxan kimi ön hissədə yerəbasma qüvvəsini itirdim. Bundan sonra bolid əvvəlki kimi sabit hərəkət etmədi və sürətimiz dərhal aşağı düşdü. Təkər qoruyucusunun bir hissəsinin zədələndiyini anlayırdım, amma görünür, problem düşündüyümüzdən daha ciddi imiş. Hər şeyi ətraflı təhlil edib dəqiq səbəbi müəyyənləşdirəcəyik.

Bütün uğursuzluqlara baxmayaraq, sonadək hücum etməyə və hər imkandan maksimum yararlanmağa çalışdım. Mənim yanaşmam həmişə belə olub. Hər şey əleyhimizə getsə də, təhlükəsizlik avtomobili yarışın gedişini dəyişənədək heç olmasa bir xal qazanmaq üçün mübarizəni davam etdirdim. Əlimdən gələni etdiyimi bilirəm və daha güclü qayıdacağıq. Bu həftəsonu azarkeşlərin dəstəyi inanılmaz idi. Spa-Frankorşamda bunun əvəzini çıxmaq üçün səbirsizliklə gözləyirəm", - deyə Antonelli komandasının mətbuat xidmətinə açıqlamasında bildirib.