FİA Macarıstan Qran-prisi öncəsi pilotlarla mühüm iclas keçirəcək

Beynəlxalq Avtomobil Federasiyası (FİA) Macarıstan Qran-prisi çərçivəsində Formula-1 pilotları ilə görüş keçirəcək.

90deqiqe.Az-ın “PlanetF1”ə istinadən məlumatına görə, iclasda əsas müzakirə mövzuları stüardların fəaliyyəti və trasda mübarizə qaydalarının tətbiqi olacaq.

Bildirilir ki, görüşün əsas gündəm mövzularından biri Belçika Qran-prisində "Ferrari" pilotları Şarl Lekler və Lüis Hemiltonun iştirakı ilə yaşanan mübahisəli insidentlər olacaq.

Lekler Oskar Piastri ilə mübarizə zamanı etdiyi manevrə görə cəzalandırılmasa da, Hemilton yarışın ilk dövrəsində Corc Rassellə toqquşduğu üçün cərimə almışdı.

Mənbənin məlumatına əsasən, əsas mübahisə cəzaların özündən daha çox, stüardların FİA-nın Beynəlxalq İdman Məcəlləsini və sürücülük standartlarına dair təlimatı necə şərh etməsi ilə bağlıdır. Hər iki sənəd müxtəlif yozumlara imkan verdiyindən qərarların ardıcıllığı ilə bağlı suallar yaranır.

Gözlənilir ki, hər iki insident FİA-nın məlumat bazasına daxil ediləcək və qəbul olunmuş qərarların səbəbləri ətraflı şəkildə izah olunacaq.

Mövsümün ortasında keçiriləcək bu görüşün pilotlarla federasiya nümayəndələri arasında qaydaların tətbiqi ilə bağlı vahid yanaşmanın formalaşmasına və gələcəkdə hakim qərarlarının daha ardıcıl olmasına töhfə verəcəyi gözlənilir.