“Mercedes”in texniki direktoru mövsümün ilk yarısını dəyərləndirdi

“Mercedes”in texniki direktoru Ceyms Ellison komandanın mövsümün ilk yarısındakı çıxışını dəyərləndirib.

90deqiqe.Az-ın məlumatına görə, “Mercedes” hər iki çempionatın lideri olsa da, britaniyalı mütəxəssis nəticələrdən tam razı olmadığını bildirib.

“Bəlkə də bu, bir qədər nankor səslənə bilər, amma istədiyim qədər məmnun deyiləm. Mövsümün əvvəlində kimsə bizə belə bir mövqe təklif etsəydi, dərhal razılaşardım. Lakin bu il bolidimizin nə qədər rəqabətədavamlı olduğunu nəzərə alsaq, düşünürəm ki, daha çox xal toplamalı idik.

Bütün komandada bununla bağlı müəyyən məyusluq hissi var. Eyni zamanda bu, mövsümün ikinci yarısı öncəsi bizə əlavə motivasiya verir və əldən çıxardığımız bəzi fürsətləri düzəltmək imkanı yaradır”, – deyə Ellison “Nu Silver Arrows” podkastında bildirib.