“Maklaren” rəhbəri İtaliya Qran-prisinin təsnifatını dəyərləndirdi

“Maklaren” komandasının rəhbəri Andrea Stella İtaliya Qran-prisinin təsnifat mərhələsinin nəticələrini dəyərləndirib.

90deqiqe.Az xəbər verir ki, “FormulaPassion.it” Andrea Stellanın dediklərini belə çatdırıb.

“Deyərdim ki, dövrə vaxtı baxımından yaxşı iş gördük. İkinci seqmentdə olduğu kimi, bolidlərimizi trasda hava axınından (slipstream) düzgün yararlana biləcək şəkildə yerləşdirməyimiz sayəsində ilk iki pilləni tutduq. Həm Oskar, həm də Lando bu işi əla yerinə yetirdilər.

Lakin buna baxmayaraq, rəqibə mane olmaqla bağlı insident yaşandı. Söhbət düzgün icradan gedəndə məsələ yalnız təmiz sürətdən ibarət deyil. Burada bir neçə amili nəzərə almaq vacibdir.

Üçüncü seqmentdə ilk cəhd zamanı bolidlərimiz hava axınından yararlanmaq üçün trasda əlverişli mövqedə idilər. Lakin Landonun qarşıda hərəkət edən bolidlə məsafəsi həddindən artıq böyük idi. Dəqiq xatırlamıram, amma düşünürəm ki, bəzi döngələrdə müəyyən qədər vaxt itirdik. Yenə də icramız ən yaxşı səviyyədə olmadı.

Digər tərəfdən, Oskar əla dövrə vurdu. Daha sonra son cəhd zamanı pelotonun tam önündə olduq. Bu zaman batareya ilə bağlı müəyyən problemlərlə üzləşdik. Monzada enerjinin hər bir faizi çox böyük vaxt itkisinə səbəb olur.

Nəhayət, ilk döngədə Oskarla bağlı problem yarandı və o, təkərləri blokladı. Ümumilikdə bir neçə istiqamətdə istədiyimiz nəticəni əldə edə bilmədik.

Monza son dərəcə unikal trasdır. Burada trasdakı mövqe bolidin sürəti qədər vacibdir. Güc qurğusunun və mühərrikin düzgün idarə olunması da eyni dərəcədə əhəmiyyət daşıyır.

Daha yaxşı çıxış edə bilərdik”, - deyə Andrea Stella bildirib.