Həmilton “Ferrari”dəki vəziyyətlə bağlı açıqlama verdi

“Formula 1” üzrə yeddiqat dünya çempionu, “Ferrari” pilotu Luis Həmilton komandadakı bəzi əməkdaşların dəyişdirilməsini tələb etdiyi barədə yayılan xəbərləri təkzib edib.

90deqiqe.Az xəbər verir ki, britaniyalı pilot sosial şəbəkə hesabında yayılan məlumatlara münasibət bildirib.

“Son vaxtlar yayılan bəzi paylaşımları gördüm və vəziyyətə aydınlıq gətirmək istəyirəm. Mən heç vaxt komandamın hər hansı üzvünün dəyişdirilməsini tələb etməmişəm. Birlikdə çalışdığım hər kəs hər gün böyük əzmlə işləyir və məhz onların işə bağlılığı bizim irəliləməyimizə kömək edir.

Mən həmişə insanlara dəstək olmağa və onların özlərinin ən yaxşı versiyasına çevrilməsinə, ən azı güclü tərəflərini görməsinə kömək etməyə çalışıram. Bəlkə də buna hər zaman nail ola bilmirəm, amma məqsədim budur və mən burada məhz bunun üçünəm. Hamımız birlikdə çalışırıq və belə də davam edəcəyik”, - deyə Həmilton bildirib.