Formula-3-ün 2027-ci il mövsümü İstanbulda başa çatacaq

Formula-3 üzrə 2027-ci il mövsümünün təqvimi açıqlanıb.

90deqiqe.Az-ın məlumatına görə, çempionat dörd qitədə keçiriləcək 10 mərhələdən ibarət olacaq. Təqvimə Ciddə, Monreal və İstanbul olmaqla üç yeni yarış məkanı əlavə edilib.

Mövsüm mart ayında ardıcıl iki mərhələ ilə başlayacaq. İlk yarış Bəhreynin Saxir şəhərində Formula-1 və Formula-2 ilə birlikdə keçiriləcək. Daha sonra pilotlar Səudiyyə Ərəbistanının Ciddə şəhərinə yollanacaqlar. Formula-3-ün 30 bolidi ilk dəfə “Ciddə Korniş” şəhər trasında mübarizə aparacaq.

Apreldə çempionat Avstraliyanın Melburn şəhərində davam edəcək. May ayında isə Formula-3 tarixində ilk dəfə Şimali Amerikada yarış keçiriləcək. Kanadanın Monreal şəhərindəki “Jil-Vilnyov” avtodromu mövsümün dördüncü mərhələsinə ev sahibliyi edəcək.

İyunda çempionat Monakoya qayıdacaq. İyul ayında isə ardıcıl olaraq Böyük Britaniyanın Silverstoun və Avstriyanın Şpilberq şəhərlərində iki mərhələ keçiriləcək.

Yay fasiləsindən sonra mövsüm daha iki ardıcıl yarışla davam edəcək. Əvvəlcə İtaliyanın Monza, daha sonra İspaniyanın Madrid şəhərində mərhələ baş tutacaq.

2027-ci il mövsümünün final yarışı Türkiyənin İstanbul şəhərində keçiriləcək. Beləliklə, İstanbul Formula-3 təqviminə daxil edilən üçüncü yeni məkan olacaq.