Azərbaycanın 5 boksçusu U-17 Avropa çempionatının finalına yüksəlib

Monteneqronun Budva şəhərində keçirilən boks üzrə U-17 Avropa çempionatında Azərbaycan millisinin 5 üzvü finala vəsiqə qazanıb.

Azərbaycan Boks Federasiyasından  90deqiqe.Az-a verilən məlumata görə, yarımfinal mərhələsində Cəmilə Muradlı (57 kq) İtaliya təmsilçisi Morena Stifanini 4:1 hesabı ilə məğlub edib. O, finalda Almaniya boksçusu Aliya İbrahimlə qarşılaşacaq.

Səma Abbasova (66 kq) da uğurlu çıxışını davam etdirib. Rusiyalı İustina Anufriyeva üzərində 4:1 hesablı qələbə qazanan idmançımız qızıl medal uğrunda həlledici döyüşdə Türkiyə təmsilçisi Ada Eybeylə üz-üzə gələcək.

Həsrət Məmmədov (46 kq) İrlandiya boksçusu Ronan Çarlza 3:2 hesabı ilə qalib gələrək finala yüksəlib. Onun rəqibi Rumıniya təmsilçisi Kristi Kaşu olacaq.

İsmayıl Nəsirzadə (52 kq) yarımfinalda irlandiyalı Martin Nevi 5:0 hesabı ilə üstələyib. Azərbaycanlı boksçu finalda İngiltərə təmsilçisi Şaylo Makleodla qarşılaşacaq.

Məhəmmədəli İstamov (57 kq) isə Ukrayna idmançısı Nikita Zaxarçenkoya 5:0 hesabı ilə qalib gələrək həlledici mərhələyə adlayıb. İstamovun finaldakı rəqibi İngiltərə boksçusu Con Elam olacaq.

Azərbaycan millisinin daha üç üzvü — Qardaş Rəhimov (54 kq), Hidayət Məmmədov (70 kq) və Xumar Cəfərli (+80 kq) yarımfinalda məğlub olaraq Avropa çempionatının bürünc medallarına sahib olublar.

Beləliklə, Azərbaycan millisi U-17 Avropa çempionatında 5 finalçı ilə təmsil olunacaq.

Qeyd edək ki, çempionatın final görüşləri oktyabrın 11-də keçiriləcək.