Hemilton Verstappenin Ostindəki trekə yönələn tənqidlərinə cavab verdi

“Formula-1” üzrə yeddiqat dünya çempionu, “Ferrari” pilotu Luis Hemilton “Red Bull” komandasının sürücüsü, dördqat çempion Maks Verstappenin Ostindəki trek örtüyü ilə bağlı tənqidlərinə qatılmayıb.

90deqiqe.Az -ın məlumatına görə, Hemilton “RacingNews365” nəşrinə açıqlamasında trekdəki nahamarlıqların trası daha maraqlı etdiyini bildirib.

“Şəxsən mən nahamarlıqları xoşlayıram, çünki onlar trasa özünəməxsus xarakter verir. Bu çağırış xoşuma gəlir. Çünki avtomobilin hərəkət etdiyini görürsən və onu idarə etmək üçün düzəlişlər etməli olursan.

İdeal dünyada trek hamar olardı, amma bu halda onun xarakteri çatışmazdı. Məhz nahamarlıqlar bu trasa əlavə özəllik verir.

Trasın konfiqurasiyası onsuz da əladır. Nahamarlıqlar isə onu daha da maraqlı edir. Birinci döngə bizim üçün ümumiyyətlə problem yaratmır. 19-cu və 9-cu döngələr bir qədər nahamardır, amma hamı eyni şəraitdə mübarizə aparır.

Bəziləri şikayətlənir, amma mənim təxminən 42 yaşım var və belimdə heç bir problem yoxdur”, – deyə Hemilton bildirib.

Qeyd edək ki, Luis Hemiltonun 42 yaşı 2027-ci il yanvarın 7-də tamam olacaq.