Sebastyan Fettel “BMW” ilə əməkdaşlığını və “Red Bull”a keçidini xatırlayıb

Formula-1 üzrə dördqat dünya çempionu, almaniyalı Sebastyan Fettel karyerasının ilk illərində “BMW” ilə əməkdaşlığını və sonradan “Red Bull”a keçidini xatırlayıb.

90deqiqe.Az xəbər verir ki, Fettel bu barədə "Motorsport" portalına müsahibəsində danışıb.

“Son nəticədə “BMW” ilə bağlı bütün planlar ilkin nəzərdə tutulduğu kimi alınmadı. Əslində, mən artıq ayrılmağa çox yaxın idim, çünki “BMW” ilə müqaviləm Formula-1-də yer almağımı nəzərdə tuturdu. Lakin bu, reallıqda heç vaxt həyata keçirilə bilməzdi.

“Kik-Zauber”də olduğum dövrdə belə şayiələr yayılmışdı ki, guya Sebastyan kifayət qədər sürətli və yaxşı deyil. İnsanlarda niyə belə təəssürat yarandığını başa düşürəm. Bəlkə də, bunda müəyyən həqiqət payı var idi. Çünki bütün elementlərin bir araya gəlməsi üçün mənə bir qədər vaxt lazım oldu.

Sonradan vəziyyət tamamilə dəyişdi. “BMW” tərəfindən marağın azaldığını demək olmazdı, sadəcə əvvəlki həvəs yox idi.

Nəticədə Ditrich Mateşits qəti mövqeyini ortaya qoydu: “Gəlin, bunu müzakirə etməyə çox vaxt sərf etməyək. Ona şans verin. Alınsa, əla. Alınmasa, deməli, alınmadı”, – deyə Fettel bildirib.

Qeyd edək ki, Sebastyan Fettel Formula-1-də dörd dəfə dünya çempionu olub və karyerasının ən böyük uğurlarını “Red Bull” komandasının heyətində qazanıb.