Hemilton “Formula-1”də karyerasını nə vaxtadək davam etdirəcəyini açıqlayıb

“Ferrari” komandasının yeddiqat dünya çempionu Luis Hemilton “Formula-1”də çıxışlarını 2030-cu illərə qədər davam etdirə biləcəyini istisna etməyib.

90deqiqe.Az-ın məlumatına görə, britaniyalı pilot bu barədə “Sky Sports”a açıqlamasında danışıb.

“Əvvəla, son 70 ildə burada mənə bənzəyən heç kim olmayıb. Düşünürəm ki, mən fərqli quruluşa malikəm. Əlbəttə, qarşıda yaşla bağlı hələ proqnozlaşdıra bilmədiyim çətinliklər var. Karyeram boyu yaş artdıqca reaksiya sürətinin zəiflədiyi barədə çoxlu fikirlər səsləndirilib. Bəs son yarışda mənim reaksiyamı gördünüz? O, burada bəzi ən gənc pilotların reaksiyasından daha sürətlidir. Özünü və zehnini formada saxlamağın bir çox yolu var.

Düşünürəm ki, hər şey bunun üçün nələrdən keçməyə hazır olmağından asılıdır. Mən hələ də bütün bunları edirəm. Dörd ildən sonra da eyni şeyləri etmək istəyəcəyimi deyə bilmərəm. Amma gördüyüm işdən hələ də zövq alıram. Hazırda bütün gücümü bu işə sərf edirəm və yaxın gələcəkdə də davam etmək niyyətindəyəm.

44 yaşımda 20 yaşlı pilotla mübarizə apara biləcəyəmmi? Bunu zaman göstərəcək. Ancaq 41 yaşımda onunla rəqabət aparmaq gücündəyəm. 2030-cu illərdə də burada olub-olmayacağımı isə zaman göstərəcək”, – deyə Hemilton bildirib.