Luis Həmilton Braziliya Qran-prisində start cəriməsi ala bilər

“Ferrari” komandasının pilotu Luis Həmilton güc qurğusunun komponentlərinin dəyişdirilməsindən sonra Formula-1 üzrə Braziliya Qran-prisinin start düzülüşündə mövqelərini itirə bilər.

90deqiqe.Az-ın "The Race" nəşrinə istinadən məlumatına görə, britaniyalı pilotun bolidində hansı komponentlərin dəyişdiriləcəyi hələ açıqlanmayıb.

Noyabrın 6-na olan məlumata əsasən, Həmilton güc qurğusunun bütün yeddi elementi üzrə istifadə limitinə çatıb. Bunlara daxiliyanma mühərriki (ICE), turbokompressor (TC), egzoz sistemi (EXH), MGU-K mühərrik-generatoru, enerji saxlama qurğusu (ES), idarəetmə elektronikası (PU-CE) və köməkçi komponentlər (PU-ANC) daxildir. Bu elementlərdən hər hansı birinin dəyişdirilməsi pilotun cərimə almasına səbəb olacaq.

Həmiltonun komanda yoldaşı Şarl Lekler də cərimə riski ilə üzləşib. Lakin nəşrin məlumatına görə, monakolu pilotun belə bir cəza alması yalnız çempionatın növbəti mərhələsində – Las-Veqas Qran-prisində mümkündür.

Qeyd edək ki, Leklerin də güc qurğusunun bütün komponentləri üzrə istifadə limiti dolub.