PSJ-nin prezidenti Nasser Əl Xələfə İsveçrə məhkəməsi tərəfindən növbəti dəfə bəraət verilib.
Corner.az xəbər verir ki, 48 yaşlı funksioner korrupsiyada ittiham olunurdu. Qətərli iş adamı həmçinin, FİFA-nın keçmiş baş katibi Jerom Valkeyə Sardiniyadakı bir evdən pulsuz istifadə etmək icazəsi verdiyi üçün qanunsuzluqda günahlandırılırdı. Həmin mənzil 2013-cü ildə Qətər şirkəti tərəfindən alınıb. PSJ-nin prezidentinin vəkili Mark Bonnan məsələ ilə bağlı bunu deyib:
“Son illər ərzində edilən böhtan xarakterli ittihamların əsassız olduğu ikinci dəfə ortaya çıxdı”.
Jerom Valke Əl Xələfi ilə əlaqəsi olmayan ayrı-ayrı ittihamlarla məhkum edilib. İsveçrənin federal cinayət məhkəməsi fransalı funksioneri sənədləri dəfələrlə saxtalaşdırmaqda və passiv korrupsiyada təqsirli bilib. O, FİFA-nın baş katibi vəzifəsindən 2015-ci ildə istefa verib.
