"Marsel" "Milan"ın futbolçusu ilə razılaşıb

Yarımmüdafiəçi İsmael Bennaser Fransada oynayacaq.

90deqiqe.Az "RMC Sports"a istinadən xəbər verir ki, "Marsel" 27 yaşlı futbolçunu birdəfəlik almaq şərti ilə icarəyə götürmək üçün "Milan" ilə razılığa gəlib.

İndi tərəflər əlcəzairli futbolçunun "Marsel" ilə müqavilə imzalaması üçün bütün inzibati rəsmiləşdirmələri tez bir zamanda tamamlamalıdırlar.

Bennaserin özü də Fransa klubunda oynamaq istəyir.

İsmael Bennaser 2024/2025 mövsümündə 8 rəsmi oyunda meydana çıxıb və komanda yoldaşlarına 1 qol ötürməsini təmin edib. Nüfuzlu Transfermarkt portalı yarımmüdafiəçini 14 milyon avro dəyərində qiymətləndirir.