Endrik “Lion”da bir oyun belə oynamadan rekord qırdı

“Real”dan icarə əsasında Fransanın “Lion” klubuna keçən braziliyalı hücumçu Endrik hələ meydançaya çıxmadan klub tarixində iz qoyub.

90deqiqe.Az xəbər verir ki, bu barədə "The Touchline" “X” sosial şəbəkəsində məlumat yayıb.

Dekabrın 23-də “Lion” Endrikin transferini klubun sosial şəbəkələrdəki rəsmi hesabları vasitəsilə elan edib. Braziliyalı futbolçunun keçidinə həsr olunan video azarkeşlər arasında böyük marağa səbəb olub və klubun sosial şəbəkələr tarixində ən çox baxılan paylaşım statusunu qazanıb.  

Mənbənin bildirdiyinə görə, dekabrın 27-si səhər saatlarına olan məlumata əsasən, Endrikin yer aldığı video 1,1 milyon baxışı keçərək “Lion” üçün yeni rekord müəyyənləşdirib.

Qeyd edək ki, Endrik “Lion” forması ilə ilk oyununa 3 yanvar tarixində, komandanın səfərdə “Monako” ilə qarşılaşmasında çıxa bilər.