"Renn" evdə PSJ-yə qalib gəldi

Fransa Liqa 1-in 2025/2026 mövsümünün 22-ci turunda "Renn" ilə PSJ arasında keçirilən qarşılaşma başa çatıb.

90deqiqe.Az-ın məlumatına görə, görüş Renn şəhərində yerləşən "Roazhon Park" stadionunda baş tutub. Oyunu baş hakim qismində fransalı referi Benoît Bastien idarə edib.

Matç meydan sahiblərinin 3:1 hesablı qələbəsi ilə yekunlaşıb.

Hesabı 34-cü dəqiqədə “Renn”in hücumçusu Musa Əl-Tamari açıb. Qarşılaşmanın 71-ci dəqiqəsində Esteban Lepol fərqi iki topa çatdırıb. Üç dəqiqə sonra Paris təmsilçisinin forvardı Usman Dembele hesab arasındakı fərqi azaldıb. Lakin 85-ci dəqiqədə Bril Embolo “PSJ”nin qapısından üçüncü topu keçirərək oyunda son nöqtəni qoyub – 3:1.

22 turdan sonra PSJ 51 xalla turnir cədvəlinə başçılıq edir. “Renn” isə 34 xalla beşinci pillədə qərarlaşıb.

Növbəti turda PSJ fevralın 21-də öz meydanında "Metz" ilə qarşılaşacaq. “Renn” isə bir gün sonra səfərdə "Auxerre" ilə üz-üzə gələcək.