Premyer Liqada komandaların sayı dəyişdirilmir

İngiltərə Premyer Liqasında çıxış edən komandaların sayı dəyişidirilməyəcək.

Corner.az Britaniya mətbuatına istinadən xəbər verir ki, bu barədə qurumun icraçı direktoru Riçard Masters danışıb. O, liqadakı komandaların sayının 20-dən 18-ə endiriləcəyi ilə bağlı yayılan məlumatları təkzib edib:

“1995-ci ildən liqamızda 20 komanda iştirak edir. Almaniya Bundesliqası istisna olmaqla, digər ölkələrdə də bu modelə üstünlük verilir. İngiltərədə futbol təqvimi yüksək səviyyəli oyunlarla doludur. İndi 20 komanda ilə keçirilən Premyer Liqa görünən gələcəkdə də eyni sayda iştirakçı ilə təşkil olunacaq”.

Qeyd edək ki, Premyer Liqada komanda sayının azalması ilə yanaşı, Liqa kuboku və Superkubokun formatının dəyişdiriləcəyi iddia olunur.