“Çelsi” İngiltərə Premyer Liqasının 19-cu turunda səfərdə “Aston Villa”ya qalib gəlib – 3:1. Corner.az xəbər verir ki, sözügedən matçda iki dəfə penalti zərbəsindən fərqlənən “Çelsi”nin futbolçusu Jorjinyo yeni uğura imza atıb.
İtalyalı yarımmüdafiəçi 2021-ci ildə çempionatda 10 dəfə penaltidən qol vurub. 30 yaşlı futbolçu Premyer Liqada bir təqvim ilində penalti zərbəsindən ən çox qol vuran futbolçu olub. O, bu göstəricidə “Liverpul”un sabiq futbolçusu Stiven Cerrardın rekordunu yeniləyib. Cerrard 2014-cü ildə çempionatda “Liverpul”la 9 dəfə penaltidən qol vurmuşdu.
