“Liverpul” İngiltərə Premyer Liqası və UEFA Çempionlar Liqasını qazanıb-qazanmamasından asılı olmayaraq, çempionluq paradı keçirəcək. Corner.az xəbər verir ki, bu barədə klubun rəsmi saytı məlumat yayıb.
Parad mayın 29-na - İspaniya “Real”ı ilə ÇL-in final oyunundan bir gün sonra baş tutacaq.
Mersisayd təmsilçisi sözügedən turnirlərdə qalib olmasa belə, İngiltərə Kuboku və Liqa Kubokunu qazanmasını qeyd edəcək. Tədbirdə futbolçuların olduğu avtobus təqdim olunacaq.
"Liverpul" Premyer Liqada 37 turdan sonra 89 xalla 2-ci pilədə qərarlaşıb. Son tur öncəsi "qırmızılar"ı lider "Mançester Siti"dən cəmi 1 xal ayırır. Premyer Liqada çempionluğun taleyi mayın 22-də bəlli olacaq.
