İngiltərənin “Mançester Siti” klubu çoxsaylı maliyyə pozuntuları ilə bağlı ittihamlara münasibət bildirib.
Corner.Az xəbər verir ki, "şəhərlilər"in yaydığı bəyanatda maliyyə feyr-pley qaydalarını pozduğuna dair iddiaları təkzib edib.
“Mançester Siti”, xüsusilə klubun Premyer Liqa rəsmilərinə təqdim etdiyi çoxsaylı təfərrüatlı materialları nəzərə alaraq, iddia edilən qayda pozuntularının yayımlanmasından təəccüblənir. Klub, klubun mövqeyini dəstəkləyən çoxlu təkzibedilməz sübutların qərəzsiz şəkildə araşdırılması məqsədi ilə müstəqil komissiya tərəfindən bu məsələyə baxılmasını alqışlayır. Ona görə də ümid edirik ki, bu məsələ birdəfəlik bağlanacaq”.
Xatırladaq ki, Premyer Liqa rəhbərliyi "Mançester Siti"ni maliyyə qaydalarını dəfələrlə pozmaqda şübhəli bilir. Məlumata görə, klub 2009/10 mövsümündən 2017/18 mövsümünə kimi maliyyə feyr-pley qaydalarını pozub. Günahı sübut olunarsa, klubu bir sıra cəzalar, o cümlədən xalların silinməsi gözləyir.
