Salah Kloppun gedişindən sonra "Liverpul"u tərk edəcək

"Liverpul"un hücumçusu Məhəmməd Salah yay transfer pəncərəsində İngiltərə klubunu tərk edə bilər.

90deqiqe.Az-ın məlumatına görə, Salah baş məşqçi Yurgen Kloppun gedişindən sonra "Liverpul"dan ayrılmağa hazırlaşır. Alman mütəxəssis mövsümün sonunda istefa verdiyini açıqlayıb. Misirli futbolçuya əsas namizəd Səudiyyə Ərəbistanının “Əl-İttihad” klubu hesab olunur. Komanda rəhbərliyi forvard üçün 200 milyon funt-sterlinq (233 milyon avro) ödəməyə hazırdır.

Xatırladaq ki, misirli futbolçu 2017-ci ildə “Roma”dan “Liverpul”a keçmişdi. Bu mövsüm Mohamed Salah İngiltərə komandasının heyətində bütün turnirlərdə 38 oyun keçirib, 24 qol vurub və 13 məhsuldar ötürmə edib. Transfermarkt internet portalının məlumatına görə, 31 yaşlı futbolçunun bazar dəyəri 65 milyon avrodur.