"Mançester Yunayted" Konfrans Liqasına düşə bilər

"Mançester Yunayted" UEFA-nın klub sahibliyi qaydalarına görə Konfrans Liqasına düşə bilər.

90deqiqe.Az "The Telegraph"a istinadən xəbər verir ki, UEFA-nın klublara sahiblik qaydaları ilə bağlı məsələlər həll olunmazsa, “Mançester Yunayted” növbəti mövsüm Avropa Liqasında yarışmaya bilər.

Ser Cim Ratklif və onun şirkəti "Ineos" iyunun 3-dək UEFA-nı “Mançester Yunayted” və “Nitsa”nın gələn mövsüm Avropa Liqasında mübarizə aparmasına icazə verilməli olduğuna inandırmalıdırlar. Ratklif, futbol əməliyyatlarına tam nəzarət etdiyi "Qırmızı şeytanlar"da 27,7% paya sahibdir və eyni zamanda 2019-cu ildə klubu ələ keçirdikdən sonra Fransanın "Nitsa" komandasının əksər səhmdarıdır.

UEFA-nın çoxsaylı klub sahibliyi ilə bağlı qaydaları hər hansı təşkilatın və ya fərdin eyni yarışda birdən çox klubun idarəçiliyinə “həlledici təsir” göstərməsini qadağan edir. Əgər həll tapılmasa, “Mançester Yunayted” Avropa Liqasını tərk etmək məcburiyyətində qalacaq, çünki komanda İngiltərə Premyer Liqasını Fransa Liqa 1-də “Nitsa”dan (5-ci) aşağı (səkkizinci) başa vurub.