Van Nistelroy və Hake “Mançester Yunayted”in məşqçilər korpusuna qoşulub

PSV-nin sabiq baş məşqçisi Ruud van Nistelroy və “Go Ahead Eagles”in keçmiş baş məşqçisi Rene Hake Erik ten Haqın “Mançester Yunayted”dəki məşqçilər korpusuna qoşulub.

90deqiqe.Az xəbər verir ki, bu barədə klubun mətbuat xidməti məlumat yayıb. Mütəxəssislərlə 2026-cı ilin iyun ayına qədər müqavilə imzalanıb.

“Şadam ki, Rene və Rude bizim layihəyə qoşulmağa razılıq verdilər. Onlar komandaya zəngin təcrübə, bilik və yeni təkan gətirəcəklər. İndi məşqçilər korpusunu yeniləmək üçün doğru vaxtdır, çünki biz ümid edirik ki, təkcə son iki ildə əldə olunan nailiyyətləri təkrarlamaq yox, həm də yeni səviyyəyə yüksələcəyik”, - klubun mətbuat xidməti Ten Haqdan sitat gətirir.

Xatırladaq ki, İngiltərə Premyer Liqasının son mövsümünün yekununda “Mançester Yunayted” 60 xal toplayaraq səkkizinci yeri tutmuşdu. FA Kubokunda hollandiyalı mütəxəssisin komandası finala yüksəlib və burada “Mançester Siti”yə 2:1 hesabı ilə qalib gəlib.

İyulun əvvəlində ingilis klubu ten Haq ilə müqaviləni 2026-cı ilə qədər uzadıb.