"Çelsi" yeni stadion tikəcək

"Çelsi" Londonun qərbində yerləşən Earl's Court ərazisində yeni stadion tikməyi planlaşdırır.

90deqiqe.Az-ın “The Guardian”a istinadən məlumatına görə, klub artıq Böyük London Administrasiyasının nəqliyyatın inkişafına cavabdeh olan “Transport for London” bölməsi ilə danışıqlar aparıb. “Çelsi” bu mərhələdə bir sıra problemlərlə üzləşib.

Birincisi, stadion qarışıq istifadəli kompleksə üstünlük verən Earls Court İnkişaf Komitəsinin tikinti planına daxil edilməyib. Bununla belə, kompromis kimi stadionun özü belə çoxfunksiyalı kompleksə çevrilə bilərdi. İkincisi, "Çelsi"nin planlarına əsas səhmdarlar arasında daxili müharibə mane ola bilər. Clearlake Capital və amerikalı iş adamı Todd Boehli bir-birlərinin səhmlərini almağa çalışırlar.

Təbii ki, klub hazırda 42 min tamaşaçı yeri olan Stamford Brici yenidən tikmək qərarına gələ bilər. Amma stadionun metro xətlərinə yaxınlığı səbəbindən bunu etmək asan olmayacaq. Hər halda, "Mavilər" rəhbərliyi bu və ya digər şəkildə İngiltərənin ən müasir və ən böyük stadionlarından birini almaq əzmindədir.