"Mançester Yunayted" daha 200 əməkdaşını ixtisar edəcək

"Mançester Yunayted"in rəhbərliyi klubun xərclərini azaltmaq istiqamətində tədbirlər görməyə davam edir.

90deqiqe.Az-ın "The Telegraph" nəşrinə istinadən yaydığı məlumata görə, yaxın günlərdə klubda daha 200 nəfərin işdən azad ediləcəyi gözlənilir.

Qeyd edək ki, bundan əvvəl artıq təxminən 250 əməkdaşla yollar ayrılıb.

Klubun əsas səhmdarlarından olan INEOS şirkətinin bu addımları ictimaiyyətin və azarkeşlərin ciddi tənqidinə səbəb olub. Hətta Avropa Liqasının finalında "Mançester Yunayted"in sahibi Cim Ratkliff klub əməkdaşları tərəfindən fitə basılıb.

Ratkliff son müsahibəsində bildirib ki, əgər INEOS bu tədbirləri görməsəydi, "Mançester Yunayted" ötən ilin Milad bayramına qədər maliyyə baxımından iflasla üzləşə bilərdi.

“Mançester Yunayted” İngiltərə Premyer Liqasının cədvəlində 16-cı yerdədir və gələn mövsüm avrokuboklarda iştirak etməyəcək.